紫蓮の翼

十二星座失戀復原大法
白羊座
　　白羊座響愛情世界裡來得快去得快，但一旦換成系被甩角色佢會因此而變得極度憂鬱、無助同自我形象低落，呢Ｄ就系白羊座失戀症候群病徵。幸好白羊的傷痛來得重但唔會維持太耐，故此重點落在點樣渡過呢段苦日子。
　　要醫好失戀傷口，白羊最重要系將精神轉移到肉體上面，上山下海，縱橫各大健身中心、各瑜珈泰拳班、到泳池狂游500米，因為白羊座的守護星系火星，如果唔將失戀的能量搵途徑釋放，白羊容易出現借酒消愁、夜店狂歡、一夜情等傷身又再傷心的自毀發洩方法，所以記得選用正確而又健康的渠道。

金牛座
　　鍾意細水長流的金牛所受的失戀打擊響12個星座之中可謂最重最慘烈，因為金牛每次拍拖講緊都系100%全情投入，並且會將對方視為自己終身伴侶，所以身心所受的創傷相對地需要較為多的時間先至可以真正恢復返。
如果識得玩樂器的就拎出來彈奏下，識得跳舞的就跳下；識得畫畫的就大畫特畫，由藝術方面入手發洩一下，唔好再同舊愛糾纏，將負心人的物品全數掉曬或拎去循環再用變賣！由金星主宰住的金牛自控能力一旦破壞就會出現暴力傾向，一受到更深打擊或遭受到挑釁，會一反常態變成一發不可收拾的變形俠醫！

雙子座
　　雙子座的符號系由一對孖仔組成，表現雙子座的特質系擁有多重性格，響開朗的背後隱藏住悲傷的另一面，所以通常響外面會睇唔出佢的傷痛，佢習慣眼淚響心裡流或者柄埋到至親面前流。
　　雙子座醫治失戀的最佳方法系針對佢精力分散呢一點，雙子座興趣廣泛，所以失戀之後最好多Ｄ出席朋友聚會，唔駛傾訴心事，只系需要無聊派對就得；另外唔怕寂寞的佢都可以搵Ｄ新事物投入。通常好快雙子就會畀其他吸引，轉移失戀帶來的痛楚。
　　
巨蟹座
　　巨蟹座談戀愛的方式系將對方變成自己生活的一部分，照顧生活起居，同伯母打關係，甚至同居，總之就系唔分晝夜癡埋一齊，所以一旦分手，連自己的基本生活都會受到大大的衝擊。
　　要忘記傷痛最重要系由家居生活開始，情況准許就系搬新屋，離開傷心地，又或者重新粉飾一下屋企，將傢俬大翻身，總之就系換過個氣氛；然後邀請三五知己到屋企攪返個大食會，千祈咪一條友柄響屋企，搵間烹飪學校學下中西式名菜都繫個唔錯的主意！

獅子座
　　天生浪漫主義者的獅子座絕對重視愛情，佢會窮一生時間去談戀愛，為滿足自己會將世界最好的東西全部獻給情人，佢談的戀愛系高調而豪華，佢唔介意公開自己的戀愛生活，要畀全世界知道佢有多幾咁好！
　　獅子並非好似表面咁堅強，要面要威的佢一旦被飛，出乎意料地脆弱的心會變成粉碎，最佳的醫治方法就系以毒攻毒，馬上再開始另一段戀情，既然要再戰江湖當然系要先備戰，去髮型屋整個新髮型，再去名店盡情shopping，總之就系要以全新形象再次投入新戀情，相信馬上會將傷痛忘記得乾乾淨淨！

處女座
　　處女座對戀愛的態度好矛盾，一方面佢渴求戀愛，時常胡意亂想發白日夢；另一方面又會好理智同冷靜分析形勢。處女座鐘意現實的戀愛，口講同心諗的浪漫系一回事，實際上實行的又會系另一回事。
　　對拍拖挑剔而且有點自視過高的處女座，一旦遇上失戀會顯得格外失落，要令佢復活，最緊要系畀佢舒緩心中的挫敗感，方法好簡單，就系搵朋友傾，無論系用電話或系飯下午茶都得，一個傾唔掂再搵第二個。正因為佢唔識得表達自己，唔好講道理，只需要囉囉嗦嗦發洩一下就得。

天秤座
　　天秤座好鍾意談戀愛，原因系佢好驚寂寞，佢需要伴侶，需要同道中人。天秤座會為另一半奉獻一切，響佢的道德標準裡面亦會專心一意對待情人，不過響佢付出幾多的同時亦會要求對方同樣畀返幾多佢。
　　一旦天秤座同情人分手，佢會忍唔住不停檢討點解會發展成咁，結果就只有徒添傷感，所以失戀中的天秤座最好多相約朋友聚會，甚至系參加一Ｄ聯誼同擴大社交活動，千祈唔好急於開始另一段戀情，要明白呢一刻治療失戀痛楚的系同伴而唔需要另一半呀！

天蠍座
　　一講到要揀愛情獨裁者答案一定落響天蠍座身上！天蠍座拍拖的方式系絕對投入同佔有慾極強，佢的愛系非常強烈，無論系用咩態度表現，佢都會將對方緊緊的控制住，有Ｄ恐怖的愛情！
　　天蠍座畀人飛絕對唔講得笑，受到冥王星同火星支配令到天蠍座思考極端同負面，如果處理得唔好佢會因愛成恨，做出Ｄ令人震驚的事，所以響呢個非常時期，天蠍座要將精力由愛情之中分離出去，催眠自己轉移到學習、事業或者工作上，總之就唔好將怨氣擴散，一定要化悲憤為力量。

人馬座
　　天生靜唔到的人馬座，連戀愛生活亦系咁，佢追求得意好玩的愛情，希望同情人每分每秒都響蜜月期，佢絕對受唔住現實同拘束，唔要情人管住癡住，同拍拖需要各有空間。
　　人馬座一旦被飛會做出一反常態的行為，例如纏住對方，哭哭啼啼；為的只系一份執著同唔輸得。所以萬一真系不幸要分手，人馬應該即刻執拾行李訂張飛機票遠走他方，盡情快快樂樂玩餐飽，如果「傷勢」嚴重就索性去第二度流浪，總之人馬對付挫敗的最佳方法就系去國外旅行。

山羊座
　　山羊座的戀愛模式系低調、內斂而有目標，佢響揀情人時，除講感覺之外仲會睇睇對方對自己有幾多利用價值。所謂的利用價值包括經濟、幫助之類，佢就系咁鬼物盡其用，好在佢的專一可以彌補一切。
　　沉默內斂的山羊座被飛，響表面上可能睇唔出佢點，但實際上佢會覺得非常傷心，只系唔識得表達。一旦失戀，山羊座的人切忌即刻投入另一份感情，否則只會換來空虛，最好系將能量轉移到工作上面，放響事業裡面燃燒，千祈咪屈響個心入面，另外怨恨對方都系一個好方法！

水瓶座
　　水瓶座睇愛情睇得幾重，不過佢對戀愛的表達方法又異於常人，佢唔會將甜言蜜語掛響口邊，而會盡心盡力照顧同懷心另一半，可惜佢往往畀人誤解成唔溫柔唔體貼唔積極，經常成為被飛的一方。
　　每次畀人飛，水瓶座都會覺得唔知點解，甚至有Ｄ唔多願賽得檢討，尤其響其他人面前，就算畀人問到分手原因都唔想多提，成日擺出一副事不關己的樣子。要重新振作，最好向公益事務入手，例如做下義工，參加無國界醫生，總之就系要將精神放響同人交往同愛心慈善的方向上面。

雙魚座
　　其實雙魚座並唔系大家想像到咁糊塗，響選擇對像時佢既要夢幻又要實際，浪漫但冇經濟的佢絕對唔會考慮，不過一旦陷入情網，雙魚座對情人系盲目同麻木，無論對方點對待自己，做出咩事都會專心一意守候仕呢份愛情。
　　糊里糊塗的雙魚座都唔系太難復活，不過最要留意系被飛的雙魚座會陷入混亂之中，佢會埋怨，會忿忿不平，會四處擺出一副受害者的模樣博同情，反而令到自己更痛苦。其實失戀的雙魚座最要學放低怨恨，然後四圍shopping，為自己攪個新形象，只要不要再怨恨，慢慢自然可以放下，再過新生活。